काठमाडौं १६ का वडाध्यक्ष मुकुन्द रिजालको निधन

काठमाडौं – काठमाडौं महानगरपालिका वडा नं. १६ का अध्यक्ष मुकुन्द रिजालको उपचारका क्रममा निधन भएको छ ।

गत पाँच दिनअघि डेंगु संक्रमित भएर ग्राण्डी अस्पतालमा उपचार गराइरहेका रिजालको आज बिहान निधन भएको महानगरपालिका स्रोतले जनाएको छ ।

फोक्सोमा पानी जमेर निमोनियाको पनि समस्या देखिएपछि रिजालको ग्राण्डी अस्पतालमा भेन्टिलेटरमा राखेर उपचार भइरहेको थियो । तर आज विहान उपचारका क्रममा निधन भएको अस्पताल श्रोतले बताएको छ ।

गत स्थानीय तहको निर्वाचनमा रिजाल नेपाली कांग्रेसका तर्फबाट निर्वाचित भएका थिए । उनी नेपाली कांग्रेस क्षेत्रनम्बर ७ का सभापतिसमेत हुन् ।

महानगरपालिकाले राष्ट्रिय सभागृहमा बिहान ११ बजे रिजालप्रति श्रद्धाञ्जली अर्पण गर्ने कार्यक्रम राखेको छ ।