दुर्गेशको नयाँ तीज गीत ‘दुर्गा नाच्छे बिच्च बिच्चमा’

काठमाडौं– हरेक वर्षको तीजमा नयाँ गीत निकालेर चर्चामा रहने गायक दुर्गेश थापाले यस पटक चर्चा बुटुल्ने नयाँ गीत बजारमा ल्याएको छ ।

यो पटक उनले दुर्गेश होइन, दुर्गा नाच्छे बिच्च बिच्चमा भन्ने गीत सार्वजनिक गरेका छन । आफ्नो सुपर हिट गीत ‘बिच्च बिच्चमा’ को छैटौँ शृङ्खलाको रूपमा उनले ‘दुर्गा नाच्छे बिच्च बिच्चमा’ ल्याएका हुन् ।

गीतको भिडियोमा दुर्गेश तेस्रो लिंगीको रूपमा देखिएका छन् भने उनले महिलाको पहिरनमा उफ्री उफ्री नाचेका छन् । गीतमा शब्द तथा सङ्गीत दुर्गेशकै रहेको छ भने स्वरमा उनलाई सुमित्रा कोइरालाले साथ दिएकी छन् ।

भिडियोको निर्देशन मौसम हिमालीले गरेका हुन् । नवराज उप्रेती र बिगेश श्रेष्ठको छायाङ्कन रहेको भिडियोमा मनोज कार्कीको सम्पादन छ ।

दुर्गेशले सन् २०१९ मा ल्याएको ‘हामी पनि नाच्नुपर्छ बिच्च बिच्चमा’ गीतबाट चर्चा कमाएका थिए ।