पत्रकारमाथी सांसद शाहीको धम्की स्वतन्त्र पत्रकारितामाथिको ज्यादती : पत्रकार महासंघ

काठमाडौं – राष्ट्रिय प्रजातन्त्र पार्टी (राप्रपा) का प्रवक्ता एवं प्रतिनिधिसभा सदस्य ज्ञानबहादुर (ज्ञानेन्द्र शाही)ले पत्रकार शंकर तिवारीमाथी दिएको धम्कीप्रति नेपाल पत्रकार महासंघले ध्यानाकर्षण भएको जनाएको छ ।

आईतबार महासंघले प्रेस वित्रप्ति जारी गर्दै पत्रकार तिवारीमाथी सञ्चारमाध्यममा प्रकाशित समाचारको विषयलाई लिएरसांसद शाही र उनका सहयोगीले धम्की दिएको घटनाप्र ध्यानाकर्षण भएको जनाएको हो । विज्ञप्तिमा गत भाद्र ६ गते बुधबार काम सकाएर घर फर्कदै गर्दा पत्रकार तिवारीलाई काठमाडौंको बिजुली बजारको पुलमा शाहीको नाम लिँदै दुई जनाले धम्क्याएको जनाईएको छ । त्यसअघि जघन्य अपराधको मुद्दा लगाएर फसाइदिने भन्दै शाहीले समेत सामाजिक सञ्जालमार्फत सन्देश पठाएर धम्क्याएको र उनका सहयोगी बताउनेले ‘जे पनि गर्न सक्छु’ भन्दै घरमै गएर धम्की दिएको जनाएको छ ।

समाचारको विषयमा कुनै गुनासो भए प्रेस काउन्सिल वा अन्य विद्यमान कानुनी उपचारको माध्यमबाट सल्टाउनुको साटो सार्वजनिक पदधारी व्यक्ति र उनका सहयोगीलगायतले गरेको यो हर्कत स्वतन्त्र पत्रकारितामाथिको ज्यादती भएको महासंघले जनाएको छ । “पत्रकारमाथिको यो ज्यादतीमा संलग्नलाई कानुनबमोजिम कारबाही गरी प्रेसको सुरक्षामा गम्भीर हुन प्रहरी प्रशासनसँग माग गर्दै महासंघ पत्रकारलाई धम्क्याएर स्वतन्त्र पत्रकारितामा आघात पु¥याउने कार्य बन्द गर्न सम्बन्धित पक्षको ध्यानाकर्षण गराउँदछ । पेशागत धर्म निर्वाहका क्रममा चित्त नबुझेका विषयलाई कानुनी उपचारमार्फत टुंग्याउन सकिने विकल्प हुँदाहुँदै पत्रकारलाई भौतिक कारबाहीको चुनौती दिनु अत्यन्त निन्दनीय र प्रेस स्वतन्त्रतामाथिको प्रहार हो । महासंघ प्रेसलाई हतोत्साहित र त्रसित बनाउने कार्यमा संलग्नको तत्काल पहिचान गरी कानुनी दायरामा ल्याएर पत्रकारलाई सुरक्षाको प्रत्याभूति दिलाउन सम्बन्धित निकायको ध्यानाकर्षण गराउँदछ ।” महासचिव रोशन पुरीद्धारा जारी गरिएको विज्ञप्तिमा उल्लेख छ ।

त्यस्तै नेपाल प्रेस युनियनले पनि पत्रकार तिवारीमाथी सांसद शाही र उनका सहयोगीले धम्की दिएको घटनाप्रति गम्भीर ध्यानाकर्षण भएको जनाएको छ । आईतबार युनियनले विज्ञप्ति जारी गर्दै पत्रकार तिवारीलाई धम्की दिने कार्य तत्काल रोक्न सम्बन्धित पक्षलाई सचेत गराउँदै धम्की दिनेलाई कानुनी दायरामा ल्याउन प्रहरी र प्रशासन समक्ष आग्रह गरेको छ ।

यसैबीच अनलाइन टिभी पत्रकार संघका उपाध्यक्ष कुशलव केसीलाई अज्ञात व्यक्तिले फोन गरी ज्यान मार्ने धम्की दिएको महासंघको भनाई छ । भदौ ५ गते मंगलबार बेलुका ८ बजे कुनै पार्टीको कार्यकर्ता बताउने अज्ञात व्यक्तिले फोन गरी गोली हान्ने, खुकुरी प्रहार गर्ने, मार्नेलगायतको धम्की दिएको उपाध्यक्ष केसीले महासंघमा जानकारी गराएका छन् ।