१ करोड पुरस्कार राशिको ‘मेरो भ्वाइस युनिभर्स’ को उपाधि प्रितम राई र ‘मेरो डान्स युनिभर्स’ को पुरस्कार खुशी कार्कीलाई

काठमाडौं– सर्वाधिक धनराशिको पुरस्कार राखिएको प्रतियोगिता ‘मेरो भ्वाइस युनिभर्स’को उपाधि भारतका प्रितम राई र ‘मेरो डान्स युनिभर्स’ को उपाधि थाइल्यान्डकी खुशी कार्कीले जितेका छन् ।

इन्ट्रा नेपाल वेलफेयर एन्ड सपोर्ट फाउन्डेसन अफ अमेरिकाले सञ्चालन गरेको दुवै प्रतियोगिताका विजेताले जनही एक करोड रुपैयाँ पुरस्कार पाएका छन् । यस्तै, फस्ट रनरअपले ३० लाख, सेकेन्ड रनरअपले २० लाख, थर्ड रनरअपले १० लाख र फोर्थ रनरअपले पाँच लाख रुपैयाँसहित विभिन्न पुरस्कार प्राप्त गरेका छन् ।

हिजो ललितपुरको गोदावरीमा भएको प्रतियोगिताको अन्तिम प्रतिस्पर्धामा अन्तिम पाँच–पाँच प्रतियोगीबाट उनीहरू छानिएका हुन् । उनीहरू दर्शक तथा स्रोताको भोटबाट छानिएका हुन् ।

मेरो भ्वाइस युनिभर्सको फस्ट रनरअप भारतका शिशिर ठटाल, सेकेन्ड रनरअप नेपालका शरद हुमागाईँ, थर्ड रनरअप नेपालकै परेश राई र फोर्थ रनरअप भारतका साइराज खाती भएका छन् । यस्तै, ‘मेरो डान्स युनिभर्स’ को फस्ट रनरअप बेल्जियमकी देवी गर्बुजा, सेकेन्ड रनरअप भारतकी मिग्मा डि लेप्चा, थर्ड रनरअप नेपालका स्वस्तिक अर्याल र फोर्थ रनरअप नेसन नेपालकै सुस्लिङ मगर भएका छन् ।

‘मेरो भ्वाइस युनिभर्स’मा गायक दीप श्रेष्ठ, सुरेश अधिकारी, अञ्जु पन्त, पुष्पन प्रधान, सुजता बर्मा निर्णायकका रुपमा थिए भने ‘मेरो डान्स युनिभर्स’मा अभिनेत्री मिथिला शर्मा, शङ्कर बिसी, दिलीप रायमाझी, प्रियङ्का कार्की, केकी अधिकारी र नरमान राई निर्णायक रहेका थिए ।