युरोपको भ्रमण छोट्टाएर नेपाल फर्कने तयारीमा माधव कुमार नेपाल : यस्तो छ कारण

काठमाडौं – नेकपा (एकीकृत समाजवादी)का अध्यक्ष माधव कुमार नेपाल युरोपको भ्रमण छोट्टाएर नेपाल फर्कने तयारी गरेका छन् ।

एकीकृत समाजवादीका उपाध्यक्ष तथा संसदीय दलका उपनेतासमेत रहेका राजेन्द्रप्रसाद पाण्डेका अनुसार अध्यक्ष नेपाल भोलि (सोमबार) बिहान नेपाल फर्कने भएका हुन् । पाण्डेका अनुसार उनी मुलुकको बदलिँदो राजनीतिक परिस्थितिलाई मध्यनजर गर्दै नेपाल फर्कन लागेका हुन् ।

अध्यक्ष नेपाल युरोपका विभिन्न देशहरू स्वीजरल्याण्ड, स्पेन क्रोएसिया र बेलायतको भ्रमणका लागि गत साउन २२ गते त्यसतर्फ गएका थिए । प्रवासी नेपाली एकता मञ्च युरोपले आयोजना गर्ने कार्यक्रममा सहभागी भएर नेता नेपाल साउन १ गते स्वदेश फर्कने कार्यतालिका रहेको थियो ।

तर, ललिता निवास, सुन प्रकरण लगायतका घटनाक्रमहरु विकसित भएकाले अध्यक्ष नेपाललाई पार्टी नेताहरूले नै भ्रमण छोट्टाएर फर्कन सुझाव दिएको पाण्डेले बताए ।

अध्यक्ष नेपाल युरोप भ्रमणमा निस्कने अघिल्लो दिन मात्रै ललिता निवास प्रकरणमा पूर्व प्रधानमन्त्री र मन्त्रीहरूलाई समेत अनुसन्धान गर्न सर्वोच्चले आदेश दिएको थियो ।