पाकिस्तानी पूर्वप्रधानमन्त्री इमरान खानलाई निवासबाटै पक्राउ गर्ने तयारी

लाहोर – पाकिस्तानी पूर्वप्रधानमन्त्री इमरान खानलाई निवासबाटै पक्राउ गर्ने तयारी गरिएको छ ।

तोशखाना मुद्दामा अदालतको फैसलापछि पाकिस्तानका खानलाई लाहोरस्थित उनको निवासबाट पक्राउ गरिएको पाकस्तिानी प्रहरीले जनाएको छ । इस्लामावादको जिल्ला तथा सत्र अदालतले पाकिस्तानका पूर्वप्रधानमन्त्री इमरान खानलाई दोषी ठहर गर्दै तीन वर्षको जेल सजाय र एक लाख रुपैयाँ जरिवाना समेत तोकेको छ ।

इमरानको पार्टी तेहरिक-ए-इन्साफले यो निर्णयलाई पक्षपाती भएको भन्दै सर्वोच्च अदालतमा चुनौती दिने बताएको छ । पार्टीका प्रवक्ताले विज्ञप्ति जारी गर्दै भनेका छन्, ‘इतिहासकै सबैभन्दा खराब मुद्दामा एक पक्षपाती न्यायाधीशले न्यायको हत्या गर्ने प्रयास गरेका छन् र मुद्दाको तथ्यलाई निश्चित एजेण्डाअन्तर्गत सार्वजनिक गरिएको छ ।’

पाकिस्तान निर्वाचन आयोगका वकिल अमजद परवेजले अदालतले सजाय सुनाएपछि खान पाँच वर्षका लागि चुनावमा भाग लिन अयोग्य ठहरिने बताएका छन् ।