पाँच वर्ष यो गठबन्धन केही हुनेवाला छैन : प्रधानमन्त्री प्रचण्ड

धादिङ – नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल ‘प्रचण्ड’ले वर्तमान सत्ता गठवन्धन आगामी पाँच वर्षसम्म कायम रहने दाबी गरेका छन् ।

सोमबार धादिङको गजुरीमा रहेको आदर्श बहुमुखी क्याम्पस भवन उद्धघाटन गर्दै प्रधानमन्त्री प्रचण्डले बाहिर हल्ला चलेजस्तो गठवन्धनका नेताहरुबीचमा कुनैपनि दरार नआएको दाबी गरेका हुन् । “यो सरकारको आयु कति भनेर पनि मिडियामा हुने नहुने, तपाईँहरूले हेर्नुभएको होला, सुन्नुभएको होला। मैले प्रधानमन्त्रीको हैसियतमा गठबन्धनसँग लगातार भएको बैठकहरू र प्रतिपक्षसँग पनि भएको बैठकको आधारमा पाँच वर्ष यो गठबन्धन केही हुनेवाला छैन। हेर्नुहोला।” उनले भने ।

६ वर्षअघी भारतीय राजदुताबासको रु.४ करोड १२ लाख रुपैंया सहयोगमा भारतिय राजदुत मन्जिव सिं पुरीबाट शिलान्याश भएको क्याम्पस भवनको आज प्रधानमन्त्री प्रचण्डले आज उद्घाटन गरेका हुन् ।