कृषि र पशुपक्षीः ५९ अर्ब बजेट विनियोजन, उत्पादनका आधारमा मात्रै अनुदान दिइने

काठमाडौं– सरकारले कृषि क्षेत्रमा गरेको लगानीअनुसारको प्रतिफल नपाइरहेका बेला अर्थमन्त्री डा. प्रकाशशरण महतले केही नयाँ कार्यक्रम घोषणा गरेका छन् ।

कृषि तथा पशुपक्षी विकास मन्त्रालयका लागि ५८ अर्ब ९८ करोड रुपैयाँ बजेट विनियोजन गरिएको छ । सरकारले ल्याएका कार्यक्रमबाट आउँदो वर्ष कुल गार्हस्थ्य उत्पादन (जीडीपी) मा कृषि क्षेत्रको योगदान बढ्ने सरकारको अपेक्षा छ ।

चालु आर्थिक वर्षका लागि कृषि तथा पशुपक्षी मन्त्रालयअन्तर्गत ५५ अर्ब ९७ करोड रुपैयाँ बजेट विनियोजन गरिएको थियो । आउँदो वर्ष यसको आकार तीन अर्बले बढेर ५८ अर्ब ९८ करोड रुपैयाँ पुगेको छ ।