हिमाली जिल्ला डोल्पामा पहिलोपटक पुग्यो बस

डोल्पा – हिमाली जिल्ला डोल्पामा पहिलोपटक यात्रुवाहक बस पुगेको छ ।

भेरी करिडोर हुँदै गएको बसलाई स्थानीयले भव्य रूपमा स्वागत गरेका छन् । बाँकेको नेपालगञ्ज, जाजरकोट, रुकुम पश्चिम हुँदै बस मंगलबार डोल्पा पुगेको हो ।

उक्त करिडोरअन्तर्गत नेपाली सेनाले सडक निर्माण सुरु गरेको नौ वर्षमा ८० प्रतिशत सडकमा गाडी गुड्न थाले पनि हिमाली जिल्ला डोल्पाको सदरमुकाम दुनैमा पहिलोपटक यात्रुबस पुगेको हो । सेनाले ट्रयाक खोलेपछि जिल्लामै पहिलोपटक यात्रुबस पुगेको स्थानीयले बताएका छन् ।

नमस्ते सगरमाथा यातायात प्राली र भेरी राप्ती यातायात प्रालीले पहिलोपटक डोल्पाको ठुलीभेरी नगरपालिकाको दुनैमा यात्रुवाहक बस पुर्याएको हो । नेपालगञ्ज हुँदै डोल्पा पु¥याइएको यो बस रुकुम पश्चिमका केही भाग र डोल्पा जिल्लाको हकमा पहिलो हो । नेपालगञ्जबाट अघिल्लो दिन हिँडेको बस डोल्पाको दुनैमा दोस्रो दिन पुगेको छ ।

जिल्लाको सदरमुकाम दुनैबाट सिधा बस सेवा सुरु भएको हो । नेपालगञ्जदेखि डोल्पाको दुनैसम्म २ सय ९२ किलोमिटर रहेको छ । मंगलबार यात्रु र सामान लिएर बस डोल्पा आएको ठुलिभेरी नगरपालिकाका नगरप्रमुख सुवर्णकुमार बुढाले जानकारी दिए । नगरप्रमुख बुढाका अनुसार दुनैमा पहिलोपटक बस पुगे पनि बसपार्क सञ्चालन तथा व्यवस्थापनमा केही समय लाग्ने बताए । उनले भने, पहिलोपटक डोल्पामा बस पुगेकोमा हामी खुसी छौँ । यहाँका नागरिकलाई यात्रा गर्न सहज भएको छ । तर, चुनौती पनि धेरै छ । सडक मर्मत, बसपार्क व्यवस्थापन लगायतका अन्य थुप्रै कामहरू छन् । नागरिकको सहजताको लागि बस व्यवसायी सरोकारवालाहरूसँग छलफल भइरहेको छ ।

यसअघि यहाँका स्थानीयलाई जिपले सेवा दिँदै आएको थियो । विगतको तुलनामा सडक राम्रो भएकोले बस सञ्चालन भएको हो । डिलक्स बस सेवा सुरु भएसँगै डोल्पाका स्थानीय खुसी भएका छन् । सडक डिभिजन कार्यालय (चौरजहारी) रुकुम पश्चिमका अनुसार सो सडकखण्डमा हालसम्म सात वटा ठुला डिलक्स बसले कार्यालयबाट अस्थायी रुट परमिट लिएका छन् भने अन्यले पनि रुट परमिट लिने क्रममा रहेको जनाइएको छ ।

लामो समयदेखि डोल्पा राष्ट्रिय सडक सञ्जालमा जोडिए पनि पहिलोपटक बस सेवा सञ्चालनमा आएको हो । डोल्पाबाट नेपालगञ्ज आउन यात्रुले ३ हजार २ सय रुपैयाँ भाडा तिर्नुपर्नेछ । बस सेवा सञ्चालन गर्ने क्षमताको सडक सुधार भएसँगै सहजरूपले बस गुडाउन, खाद्यान्न ढुवानी गराउन, गाउँवासीका सवारीसाधन घरगाउँमै पुर्याउन सहज भएको छ । यातायातको साधनद्वारा डोल्पाबासीलाई नियमित यात्रा गर्न सहज भएको छ ।

नियमित बस सेवा सञ्चालन भएपछि डोल्पाका किसानले आफ्ना बारीमा उत्पादित स्याउ, सिमी लगायतका हिउँदे तरकारी बिक्रीका लागि नेपालगञ्ज र काठमाडौंका बजारमा पु¥याउन सजिलो भएको स्थानीय बासिन्दाले बताएका छन् । डोल्पामा बस पुगेसँगै जाजरकोट, रुकुम पश्चिमका केही भाग र डोल्पाको चीन सिमाना सम्मका यात्रुले लाभ लिने जनाइएको छ ।