रविको राहदानी दुरुपयोगसम्बन्धी मुद्दामा आज सुनुवाइ हुँदै

काठमाडौं – राष्ट्रिय स्वतन्त्र पार्टी (रास्वपा)का सभापति रवि लामिछानेमाथिको राहदानी दुरुपयोगसम्बन्धी मुद्दाका सम्बन्धमा परेको रिटमा आज सुनुवाइ हुँदैछ।

उनीमाथि राहदानी दुरुपयोगमा मुद्दा नचलाउने महान्यायाधिवक्ताको निर्णयविरूद्ध सर्वोच्च अदालतमा सोमबार युवराज सफलले दयार गरेको रिट दर्ता भएको थियो।  यसपछि हिजो (मंगलबार) पेसी तोकिए पनि हेर्न नमिल्ने भएपछि आजका लागि सुनुवाइ तोकिएको हो। न्यायाधीश अनिलकुमार सिन्हाले अघिल्लोपटक संवैधानिक इजलासबाट लामिछानेको मुद्दा फैसला हुँदा आफू पनि त्यस इजलासमा रहेको भन्दै मुद्दा ‘हेर्न नमिल्ने’मा राखेका थिए।

चैत ६ गते महान्यायाधिवक्ता दिनमणि पोखरेलले लामिछानेविरूद्ध राहदानी दुरुपयोगमा मुद्दा नचलाउने निर्णय गरेका थिए। त्यसअघि जिल्ला सरकारी वकिलको कार्यालय काठमाडौं, उच्च सरकारी वकिलको कार्यालय पाटनले लामिछानेविरूद्ध मुद्दा चलाउन आवश्यक नभएको प्रतिवेदन महान्यायाधिवक्ता कार्यालयमा बुझाएका थिए।