साथीको घरमा पाहुना आएका युवकको रहस्यमयी मृत्यु

विराटनगर – विराटनगर महानगरपालिका – ४ स्थित साथीको घरमा पाहुना आएका एक युवकको  मृत्यु भएको छ ।

विराटनगर – १३ का २१ वर्षीय शौरव यादवको सोमबार राति मृत्यु भएको प्रहरीले जनाएको छ ।  यादव आफ्ना साथी अनोज चौधरीको घर आएका थिए । अचानक बेहोस भएपछि उपचारका लागि विराट नर्सिङ होम एवं विराटनगर अस्पताल लगिएको थियो ।

अस्पताल पुर्‍याउनसाथ चिकित्सकले राति ८ बजेतिर मृत घोषित गरेको प्रहरीले जनाएको छ । यादवको मृत्युको कारण खुल्न बाँकी छ । उनी लागूऔषधका सेवनकर्ता रहेको दाबी प्रहरीको छ ।

लागूऔषधको मात्रा धेरै भएर मृत्यु भएको हुन सक्ने प्रहरीको अनुमान छ । प्रहरीका अनुसार शव पोस्टमार्टमका लागि कोसी अस्पतालमा राखेर घटनाको अनुसन्धान सुरु गरिएको छ ।