सिन्धुपाल्चोकमा पहिरोले पुरिएर युवकको मृत्यु

सिन्धुपाल्चोक – जिल्लाको त्रिपुरासुन्दरी गाउँपालिका – ४ पिस्कर गाउँका एक युवकको पहिरोले पुरिएर मृत्यु भएको छ ।

त्रिपुरासुन्दरी गाउँपालिका अध्यक्ष भक्तध्वज बोहोराका अनुसार मामाघर पुगेर फर्किएका १७ वर्षीय अमित थामीको भुसुन डोलको खोलाले निम्त्याएको पहिरोमा परेर मृत्यु भएको हो । दिउँसो पहिरोले पुरिएलगत्तै स्थानीयले उद्धार सुरु गरेका थिए । मृतक थामीको एक हात काटिएको अवस्थामा पहिरोबाट शव निकालिएको छ । थामी स्थानीय मंगलमाई माध्यमिक विद्यालयको कक्षा ११ मा अध्ययनरत थिए ।

अत्यधिक वर्षा र पहिरोका कारण भुसुन डोल खोलाक्षेत्र र पुरानो पिस्कर गाउँको माथिल्लो भूभाग प्रभावित भएको छ । पिस्करको माथिल्लो भूभागका धेरै स्थानमा पहिरो गएपछि पुरानो पिस्कर गाउँमा ७ घर जोखिममा परेका छन् । साथै स्थानीयहरूलाई सुरक्षित स्थानमा सार्ने तयारी गरिएको गाउँपालिका अध्यक्ष  बोहोराले बताए ।