स्पेनमा प्रचण्ड गर्मी : पाँच सय बढीको मृत्यु

स्पेन – पछिल्लो केहिदिन यता गर्मी बढेसंगै स्पेनमा पाँचसय बढिको ज्यान गएको छ ।

गत सोमबार सम्ममा तातो हावाबाट ज्यान गुमाउनेको संख्या पाँच सय दश पुगेको स्वास्थ्य मन्त्रालयले जनाएको छ । देशका विभिन्न भागको तापक्रम ४५ डिग्री सेल्सियससम्म पुगेको छ भने गर्मीका कारण मानिसहरुको ज्यान जाने क्रम पनि रोकिएको छैन ।

यही जुलाई १० तारिखदेखि गर्मी सुरु भएको हो । गर्मीका कारण यहाँको जनजीवन निकै कष्टकर बनेको छ ।स्वास्थ्य मन्त्रालयले तातो हावा सुरु भएको हप्ता जुलाई १० देखि १६ तारिखसम्ममा एक सय ५० जनाको ज्यान गएको जनाएको छ । त्यसयता पनि तातो हावाको असरले ज्यान जाने क्रम नरोकिएको भन्दै अधिकारीहरुले सोमबारसम्म पाँच सय १० जनाको मृत्यु भएको बताएका छन् । गर्मीका कारण ज्यान गुमाउने अकिांशमा ज्येष्ठ नागरिक छन् ।

उनीहरुमध्ये तीन सय २१ जना ८५ वर्षभन्दा माथिका नागरिक हुन् ।गर्मी अझै बढ्ने अनुमान गरिएको र त्यसबाट ज्यान जानेको संख्या थप बढ्न सक्ने भन्दै सतर्कता अपनाउन स्वास्थ्य मन्त्रालयले सूचना जारी गरेको छ ।