‘हाम्रो समाचार लेख्ने तँ को , हेर्दै जा हामी के गर्छौं’ भन्दै पत्रकारमाथी धम्की

काठमाडौं – राजधानीको न्यूरोडमा अवस्थीत बाबा एजुकेशन कन्सल्टेन्सीका सञ्चालक राजेन्द्र शर्माले पत्रकारमाथी धम्की दिएका छन् ।

कन्सल्टेन्सीका सञ्चालक शर्माले दियोपोस्ट अनलाईनका प्रधानसम्पादक सुदिप बिश्वकर्मालाई टेलिफोन गरी धम्की दिएका हुन् । शर्माले गत शनिवार अनलाईनमा प्रकाशित् समाचारको विषयलाई लिएर धम्की दिएका हुन् । ‘म बाबा एजुकेशनबाट राजेन्द्र हुँ । तपाईंको पोस्टमा हावादारी कुरा निकाल्नु भएको रहेछ । तपाईंले के आधारमा लेख्नु भयो ?’ शर्माको प्रश्न थियो ।

तर, प्रधानसम्पादक बिश्वकर्माले कन्सल्टेन्सीले भिजिट भिषामा मानिसलाई बाहिर पठाउन पाउँछ ? भन्ने प्रश्न गरेपछि शर्मा झन् आक्रोशित बनेका थिए । ,‘तपाईंलाई थाहा छ कन्सल्टेन्सीको बारेमा ? के भनेर लेख्नु भयो ? तपाईं को हो ? किन समाचार निकालेको ?’ भन्दै शर्माले धम्कीसहित प्रति प्रश्न गरेका थिए ।

उता जवाफमा बिश्वकर्माले समाचार लेख्नु मिडियाको धर्म भएको बताउँदा भने उनी फेरी तल्लो स्तरमा उत्रेर गाली गलौचमा उत्रिएका थिए, ‘तैँले के तरिकाले न्युज निकालेको ? सबै प्रुफ देखा , तँ को हो हाम्रो समाचार लेख्ने ? साले चोरहरु ! ठीकै छ हामी के गर्छौं हेर्दै जा,  तिमीहरु चोरहरु हो ।’ त्यति भनेपछी शर्माले फोन काटेका थिए ।

शैक्षिक परामर्शदात रुपमा दर्ता रहेको बाबा एजुकेशन कन्सल्टेन्सीले भिजिट भिषामा मानव तस्करी गरिरहेको खुलाशा गर्दै अनलाईनमा समाचार प्रकाशन गरेपछी कन्सल्टेन्सीका संचालक शर्मा आक्रोशित बनेको बिश्वकर्माले बताए ।

शर्माको स्वामित्व रहेको बाबा एजुकेशन कन्सल्टेन्सीले अष्ट्रेलियामा विभिन्न कार्यक्रममा भिजिट भिषामा मानव तस्करी गर्दै आएको विषयमा समाचार प्रकाशन गरेको थियो ।