आफ्नै दलबाट निर्वाचित् जनप्रतिनिधीलाई पार्टी प्रवेश गराँउदै नेपाली काँग्रेस

कोहलपुर – राप्तीसोनारी गाउँपालिका वडा नम्बर ६ फत्तेपुर बाँके निवासी लक्ष्मी थारु जन्मजात काँग्रेस हुन् । २०७४ सालको स्थानीय निर्वाचनमा काँग्रेसका तर्फबाट वडामा महिला सदस्य पदमा चुनाव समेत लडेकी थिईन् । पार्टीको १४ औं अधिवेशनमा उक्त वडाबाट क्षेत्रीय प्रतिनिधीमा निर्वाचित भएकी उनी नेपाली काँग्रेस राप्तीसोनारी गाउँपालिका कार्यसमिति सदस्य पनि हुन् ।

पार्टीको सक्रिय कार्यकर्ता भएको र शिक्षा क्षेत्रमा योगदान रहेको भन्दै काँग्रेसले नेतृत्व गरेको राप्तीसोनारी गाउँपालिकाको शिक्षा समितिको सदस्य पनि छिन् । नेपाली काँग्रेस क्षेत्र नम्बर –  १ बाँकेले सोमबार कोहलपुरमा आयोजना गरेको सभामा पार्टी प्रवेश गर्ने ब्यक्तिको नाम उच्चारण हुँदा उनी छांगाबाट खसेझै भईन् । माओबादी परित्याग गरेर काँग्रेसमा प्रवेश गरेको भन्दै उद्घोषकले नाम उच्चारण गरेपछि उनी झस्किईन् र कार्यक्रम स्थलभन्दा बाहिर आएर रुन न हाँस्ने अवस्थामा पुगिन् ।

‘म जन्मजात काँग्रेसमा छु, तर मलाई आज माओबादी परित्याग गरेर काँग्रेसमा प्रवेश गरेको ट्याग लगाइयो,’ उनले कार्यक्रम स्थलमा गुनासो गर्दै भनिन् ‘मेरो नाम कस्ले टिपाइदियो र मेरो मान मर्दन गर्यो, यसको छानविन हुनुपर्छ ।’ लक्ष्मीले जस्तै राप्तीसोनारी– ६ फत्तेपुरकै रुपा थारु र बाबुराम थारुले पनि छांगाबाट खसेझै अनुभुती गरे ।

पार्टी प्रवेश गरेको भन्दै उनीहरु दुबैको नाम पनि उद्घोष गरियो । रुपाले मञ्चमा पुगेर टिका लगाईन्, तर बाबुराम लाजले मञ्चमा गएनन् । काँग्रेसको १४ औं अधिवेशनबाट नेतृ रुपा राप्तीसोनारी – ६ मा वडाको सह–सचिवमा निर्वाचित भएकी हुन्, भने फोरम लोकतान्त्रिक पार्टी समायोजन पश्चात बाबुराम काँग्रेसमा सक्रिय रहँदै आएका छन् ।

‘पार्टी प्रवेशमा मेरो नाम आएपछि मलाई अप्ठ्यारो लाग्यो, मैले भन्दा भन्दै जवरजस्ती मञ्चमा पठाईहाले,’ रुपाले भनिन् ‘टिका लगाइसकेपछि मलाई धेरै नमजा लाग्यो, म त वडाको निर्वाचित सह–सचिव पो हुँ ।’ बाबुरामले आफु मञ्चदेखी टाढा बसेको र नाम उच्चारण भएपछि लाजले बाहिर निस्केको बताए । ‘म कुनैबेला लोकतान्त्रिक फोरममा थिए, काँग्रेसमा समायोजन भइसकेपछि म काँग्रेसमै छु, कतै गएको छैन, तर आज मलाई माओबादी छाडेर आएको बिल्ला भिडाइयो,’ उनले भने ।

पार्टी प्रवेश गर्ने ब्यक्तिको नाम उच्चारण गर्दा कार्यक्रम सञ्चालकले राप्ती सोनारी ६ बाट स्थानीय सञ्जय राणाको पहलमा एक सय ४० जनाले माओबादी परित्याग गरेर काँग्रेसमा प्रवेश गरेको उद्घोष गरेका थिए । राणा वडाको कुनैपनि जिम्मेवारीमा छैनन् । पार्टी प्रवेश गराउने क्रममा वडा नम्बर– ६ का सभापति लवराज खरेल त्यहाँ देखिएनन् ।

तर, कार्यक्रम स्थलमा भेटिएका वडा सभापति खरेलले पार्टीको वडा समितिसँग कुनै समन्वय नगरेर एक सय ४० जनाको नाम उच्चारण गरिएको र पार्टीमा लामो समयदेखी सक्रिय भएका तथा जिम्मेवार पदमा रहेका कार्यकर्ताको नाम प्रवेशमा उच्चारण हुँदा नरमाईलो लागेको बताए । ‘हामीले अरुलाई पार्टीमा प्रवेश गराउँदा आफ्नै कार्यकर्ताको अपमान गर्नु राम्रो होईन, विधि र प्रक्रियालाई मिच्दा यस्तो परिणाम आएको होे,’ खरेलले भने ‘वडा समितिसँग समन्वय गरेर प्रवेश गराएको भए यस्तो अवस्था आउने थिएन ।’

पार्टी प्रवेश गराउने नाममा विधि र प्रक्रिया मिचिएको बताए । वडाले विभिन्न ८८ जनालाई प्रवेश गराउने लिष्ट तयार गरेपनि आफ्नै कार्यकर्ताको अपमान भएपछि त्यसलाई रोकेको खरेलले सुनाए ।

नेपाली काँग्रेस राप्तीसोनारी गाउँपालिका सभापति भिम रानाक्षेत्रीले पार्टी प्रवेश गराउने विषयमा क्षेत्रीय समितिले गाउँपालिका र सम्बन्धित वडासँग समन्वय नै नगरेको बताए । ‘पार्टीको कुनैपनि विधिवत संरचनासँग समन्वय नगरेर प्रवेश गराइयो, जसको परिणाम आज कोहलपुरमा देखियो, लामो समयदेखी पार्टीमा आवद्ध कार्यकर्ताको मानमर्दन भएको छ,’ सभापति रानाक्षेत्रीले भने ।

काँग्रेस क्षेत्र नम्बर – १ ले भने कोहलपुरमा सोमबार आयोजित उक्त कार्यक्रममा ५ सय ८१ जना कांगे्रेसमा प्रवेश गरेको जनाएको छ ।