एमसीसीले कसरी राष्ट्रियतामा आघात पुर्‍याउँछ पुष्टि गरिदिन्छु : भीम रावल

काठमाण्डौ – नेकपा एमालेका नेता भीम रावलले एमसीसीले कसरी राष्ट्रियतामा आघात पुर्‍याउँछ भन्ने पुष्टि गरिदिने बताएका छन् ।

आइतबार प्रतिनिधि सभाको दोस्रो बैठकमा एमसीसीमाथिको व्याख्यात्मक प्रस्तावको छलफलमा भाग लिँदै रावलले एमसीसीले कसरी राष्ट्रियतामा आघात पुर्‍याउँछ भन्ने पुष्टि गरिदिने बताएका हुन् । त्यस्तै रावलले एमसीसी सम्झौतालाई एक ठग पत्र भएको आरोप लगाउँदै यो अन्तर्राष्ट्रिय कानुन विपरीत भएको दाबी गरेका छन् । उनले एमसीसीका हरेक दफा र धारा कसरी राष्ट्रिय हित विपरीत छन् र त्यसले कसरी राष्ट्रियता र स्वाधिनतामा आघात पुग्छ भन्नेबारे जवाफ दिन आफू तयार रहेकोसमेत चुनौती दिए । नेता रावलले प्रधानमन्त्री शेरबहादुर देउवालाई र उनका निकटस्थहरूलाई लक्षित गर्दै यस्तो चेतावनी दिएका हुन् । आइतबार राति संसद्‍ बैठकमा भएको दबाफार छलफलको क्रममा रावलले यस्तो बताएका हुन् ।

‘प्रधानमन्त्री शेरबहादुर देउवा जी र उहाँका सल्लाहकारहरू आउनुस् मलाई आधा घण्टा समय दिनुस् । एमसीसीको मूल सम्झौता, कार्यान्वयन सम्झौता र त्यसका धारा दफाले नेपालको स्वतन्त्र परराष्ट्र नीति र स्वाधिनतामा कसरी आघात पुर्‍याउँछन् म प्रमाणित गरिदिन्छू । के मलाई समय दिइन्छ ?’, रावलले भने, ‘को विद्वान र को सल्लाहकार हुनुन्छ आउनोस् । प्रत्येक धारा र दफा ल्याएको छु मैले । मलाई थाहा छ जसले हतारमा राष्टंरियताको यति गम्भीर विषयलाई पास गर्न खोज्दै छ यही नै राष्ट्रिय हित विपरीत छ ।’

यस्तै उनले कुनै पनि देशप्रति जिम्मेवार सरकारले रातारात संविधान मिचेर यसरी संसद्‍मा पेस नगर्ने भन्दै एमसीसीप्रति आशंका व्यक्त गरेका थिए । यसवाहेक उनले महाकाली सन्धिको संकल्प प्रस्तावको प्रसंग कोट्याउँदै प्रधानमन्त्री देउवालाई उक्त संकल्प प्रस्ताव माग समेत गरेका थिए ।