छरिएका माओवादी घटकहरूलाई पुनः एकताबद्ध हुन प्रचण्डको आग्रह

काठमाण्डौ – नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले विभिन्न समूहमा छरिएर रहेका माओवादी घटकहरूलाई पुनः एकताबद्ध हुन आग्रह गरेका छन् ।

आईतबार २७औँ जनयुद्ध दिवसका अवसरमा शुभकामना दिँदै अध्यक्ष प्रचण्डले देशको अगाडि आइपरेको समस्यालाई आत्मसात गर्दै छरिएर रहेका माओवादी घटकहरूलाई पुनः एकताबद्ध हुन आग्रह गरेका हुन् । प्रचण्डले परिवर्तनका लागि लडेका शक्तिहरू एक भए वर्तमान परिवर्तनलाई अझै सुदृढ र समृद्ध गर्न सकिनेसमेत विश्वास व्यक्त गरेका छन् ।

प्रचण्डद्धारा प्रकाशित् सन्देशमा भनिएको छ ‘परिवर्नतकारी क्रान्तिकारी शक्तिबीचको एकता भएमात्रै जनयुद्ध दिवस मनाउनुको अर्थ, महत्व र औचित्य रहन्छ । नेपालको इतिहासमा जनयुद्धको भूमिका दूरगामी महत्वको रहेको छ । नेपाली राजनीतिक र सामाजिक परिवर्तनको इतिहासमा पनि यो मुक्तियुद्धका रूपमा स्थापित भइसकेको छ । जनयुद्धको जगमा सम्पन्न भएको २०६२/६३ को संयुक्त जनआन्दोलनपश्चात मुलुक सङ्घीय लोकतान्त्रिक गणतन्त्रको रूपमा संस्थागत भएको हो । संविधानसभामार्फत नयाँ संविधान निर्माण हुनु र संविधानले मुलुकलाई सङ्घीय गणतन्त्रात्मक शासन प्रणालीका साथै धर्मनिरपेक्ष, समावेशी तथा समानुपातिक प्रतिनिधित्व सुनिश्चित गरिनु पनि जनयुद्धकै योगदान थियो ।’ उनले भनेका छन् ।