चिकित्सा शिक्षा आयोगका उपाध्यक्षको गाडी तोडफोड

काठमाण्डौ – चिकित्सा शिक्षा आयोगका उपाध्यक्ष प्राध्यापक डा.श्रीकृष्ण गिरी चढेको गाडी बिहीबार तोडफोड भएको छ ।

आयोगको कार्यालय भक्तपुर सानोठिमी जाँदा बिहान ११ बजे काठमाडौं त्रिभुवन अन्तर्राष्ट्रिय विमानस्थल पछाडि काँडाघारीमा गिरी चढेको प्रदेश ३ – ०१ ००२ झ ४९१५ नम्बरको गाडीलाई ढुंगा प्रहार गरिएको सदस्य सचिव भोजराज काफ्लेले जनाए । ढुंगाले गाडीको पछाडिको सिसा फुटेको छ ।

आयोगले विज्ञप्ति जारी गरेर घटनामा संलग्नलाई कारबाही गर्न माग गरेको छ । गिरीमाथि नै आक्रमण गर्ने उद्देश्यले आक्रमण गरिएको आयोगले जनाएको छ ।  घटनापछि काठमाडौं र भक्तपुर प्रहरीलाई खबर गरिएको थियो । घटनाबारे अनुसन्धान भइरहेको काठमाडौं प्रहरीले जनाएको छ । कसले ढुंगा प्रहार गर्‍यो भन्ने खुलेको छैन ।

चीनमा चिकित्सा शिक्षा पढेर इन्टनसीप पूरा गर्न नपाएका विद्यार्थी र अतिरिक्त शुल्कको विषयमा एमबीबीएस लगायतका विद्यार्थी आयोगसँग असन्तुष्ट हुँदै आन्दोलनमा छन् ।

यसअघि चीनबाट फर्केका इन्टनसीप पूरा गर्न बाँकी रहेका विद्यार्थीले गिरीमाथि दुर्व्यवहारको प्रयास गरेका थिए । गिरीमाथि पटक/पटक आक्रमणको प्रयास हुँदै आएको छ ।