सीमभञ्ज्याङमा हिँउ परेपछी त्रिभुवन राजपथ अवरुद्ध

हेटौंडा – मकवानपुर जिल्लाको सीमभञ्ज्याङ र अघोरमा हिँउ परेपछी बिहानैदेखि त्रिभुवन राजपथ अवरुद्ध भएको छ।

त्रिभुवन राजपथअन्तर्गत पर्ने सीमभञ्ज्याङ र अघोरमा गए रातिदेखि बाक्लो हिउँ पर्नाले आज बिहान सवा ७ बजेदेखि यातायात अवरुद्ध भएको इलाका प्रहरी कार्यालय पालुङका प्रहरी निरीक्षक श्रीराम तिमल्सिनाले जानकारी दिए।

उनका अनुसार उक्त स्थानमा अहिले हिउँ परिरहेकाले काठमाडौंबाट हेटौंडातर्फ र हेटौंडाबाट काठमाडौंतर्फ जाने विभिन्न सवारीसाधन सञ्चालन गर्दा दुर्घटना हुने सम्भावनाको जोखिम देखिएकाले यातायात सञ्चालनमा रोक लगाएको हो।

उनले मौसम सुधार भएमा आज दिउँसो अपराह्नसम्ममा हिउँ पन्छाएर यातायात सञ्चालन गर्ने तयारी भइरहेको बताए।