कांग्रेस अधिवेशनमा मन्त्रीका अंगरक्षकले गोली चलाएपछी हंगामा : सर्लाही बलरा तनावग्रस्त

सर्लाही – नेपाली कांग्रेसको वडा अधिवेशनका क्रममा प्रदेशमन्त्रीका अंगरक्षकले चलाएपछी सर्लाहीको बलरामा हंगामा मच्चिएको छ ।

कांग्रेसको वडा अधिवेशनअन्तर्गत सर्लाहीको बलरामा विवाद हुँदा प्रदेश २ का महिला बालबालिका युवा तथा खेलकुदमन्त्री वीरेन्द्र सिंहका अंगरक्षकले चलाएका हुन् । विवादका कारण बलरामा हंगामा मच्चिएपछी अहिले २ वटा वडाको अधिवेशन रोकिएको छ ।

बलरा नगरपालिका ९ अचलगढमा वडा अधिवेशनको छलफलको क्रममा प्रदेश २ का महिला बालबालिका युवा तथा खेलकुदमन्त्री वीरेन्द्र सिंह पुगेका थिए । उनले वडामा असन्तुष्टि जनाएपछि दुई पक्षबीच विवाद चुलिएको थियो । जारी विवादकै क्रममा मन्त्रीका अंगरक्षकले हवाई फायर गरेका थिए ।अहिले बलराको अवस्था तनावग्रस्त भएको प्रहरी उपरीक्षक कृष्ण प्रसाईंले बताए ।

यसअघि पनी गत शनिबार सदरमुकाम मलंगवास्थित पार्टी कार्यालयमा पनि दुई पक्षबीच विवाद हुँदा मन्त्रीका अंगरक्षकले इतर पक्षका नेता बलिराम झा र विनोद खनालमाथि पेस्तोल ताकेका थिए । जसका कारण पार्टी कार्यालय भित्रै झडप भएको थियो ।