जाजरकोटमा बस दुर्घटना : ५ को मृत्यु , २७ जना घाइते

जाजरकोट – जाजरकोटमा बस दुर्घटना हुँदा पाँच जनाको मृत्यु भएको छ ।

आइतबार बिहान दुई बजे नेपालगन्जदेखि रुकुम पश्चिमको राडिबजार जाँदै गरेको ना ६ ख २७५७ नम्बरको रात्री बस भेरी नगरपालिका कुदु बराहचौकनजिक दुर्घटना हुँदा ५ जनाको घटनास्थलमै मृत्यु भएको हो । बस सडकभन्दा करिब १५० मिटर तल खसेको प्रमुख जिल्ला अधिकारी प्रेमप्रसाद देवकोटा बताए ।

बसमा ३२ जना यात्रु सवार थिए । घाइते रहेका २७ जनालाई प्रहरीले आफ्नै दुई वटा गाडीमा र अन्य बसमा उद्धार गरी जिल्ला अस्पताल जाजरकोटमा ल्याएको प्रजिअ देवकोटाले बताए । राति बस दुर्घटना भएका कारण उद्धारमा ढिलाई भएको उनले बताए ।