गजुरीमा ट्रकको ठक्करबाट छोरीको मृत्यु : आमा गम्भीर घाइते

धादिङ – पृथ्वी राजमार्गअन्तर्गत धादिङको गजुरीमा ट्रकले ठक्कर दिँदा एक बालिकाको मत्यु भएको छ ।

आज बिहिवार, गजुरी गाउँपालिका २ चालिसेमा वीरगन्जबाट काठमाडौं जाँदै गरेको ना ६ख १४९७ नम्बरको सिमेन्ट बोकेको मालबाहक ट्रकले पैदल यात्री आमाछोरीलाई ठक्कर दिएको थियो । ट्रकले ठक्कर दिँदा धादिङको सिद्धलेक गाउँपालिका – १ नलाङकी ११ वर्षीया कृपा अर्यालको घटनास्थलमै ज्यान गएको ईलाका प्रहरी कार्यालय गजुरीले जनाएको छ ।

इलाका प्रहरी कार्यालय गजुरीका डिएसपी भावेश रिमालका अनुसार दुर्घटनामा परी घाइते बनेकी आमा मिठु अर्यालको गजुरीस्थित स्वास्थ्य चौकीमा प्राथमिक उपचारपछि काठमाडौं ट्रमा सेन्टर पठाइएको छ । दुर्घटना लगत्तै ट्रकका चालकलाई प्रहरीले नियन्त्रणमा लिएको छ ।