धादिङमा एमसीसी विरुद्ध प्रदर्शन

२७ भदौ,धादिङ – धादिङमा राप्रपा निकटका कार्यकर्ताहरुले एमसीसी विरुद्ध र्‍यालीसहितको प्रदर्शन गरेको छ ।

आईतबार धादिङ सदरमुकाममा राप्रपा धादिङका कार्यकर्ताहरुले एमसीसी विरुद्ध र्‍यालीसहितको प्रदर्शन गरेका हुन् । आईतबार दिउँसो १२ बजे पुछार बजारमा भेला भई राप्रपा कार्यकर्ताहरुले देश बेच्न पाईदैन, एमसीसी हामीलाई चाहिदैन भन्दै र्‍याली प्रदर्शन गरेका थिए । प्रर्दशनकारीहरुले देश बेच्न पाईदैन, एमसीसी चाहिदैन, ‘वी हेट एमसीसी, रिजेक्ट एमसीसी, गेट आउट एमसीसी, गो ब्‍याक एमसीसी’ लगायतका नारा लेखिएको प्लेकार्डसहित र्‍यालीमा सहभागि भएका थिए ।

बेनीघाट बजारमा पनि प्रदर्शन

बेनीघाट रोराङ गाउँपालिकाको बेनीघाट बजारमा स्थानीय युवाहरुले एमसीसी बिरुद्ध प्रदर्शन गरेका छन् । बेनीघाट बजारका स्थानीय युवाहरुले ५५ अरवमा देश बेच्न पाईदैन एमसीसी खारेज गरौ भन्दै विरोध प्रदर्शन गरेका छन् ।