बेपत्ता भएको १ महिनापछी महोत्तरीका सुजिता ठाकुरको शव फेला

२७ असार,महोत्तरी – बेपत्ता भएको एक महिनापछी महोत्तरीका सुजिता ठाकुरको शव फेला परेको छ ।

गत जेठ १९ देखि बेपत्ता भएकी २६ वर्षीया युवती ठाकुरको शव महोत्तरीको लोहरपट्टी नगरपालिका वडा नम्बर ७ स्थित भ्रमरपुरामा आज शव भेटिएको हो । सुजिताको शव पेट्रोल पम्पको छेउमा रहेको शौचालयको हदबाट बरामद भएको महोत्तरी प्रहरीले जनाएको छ । शव २ नम्बर प्रदेश प्रहरी कार्यालय जनकपुर र महोत्तरी प्रहरीको संयुक्तरुपमा उत्खनन गरि फेला पारेको हो ।

शव फेला परेको स्थानदेखि करिब एक किलोमिटरको दुरीमा रहेको खेतमा असार १३ गते उत्खनन गर्दा सुजिताले लगाएको लुगासहित शरिरका अवशेषहरु फेला फरेको थियो । सुजिताको हत्याको आरोपमा देवर रूपेश ठाकुर र श्रीमान मुकेश ठाकुरलाई प्रहरीले पक्राउसमेत गरेको छ । महोत्तरी जिल्ला भमरपुरा गाउँमा ससुराली रहेको सुजिता ठाकुरको हत्या गत जेठ २० गते भएको खुलेको छ । सुजिताको हत्याबारे उनकै ५ बर्षीय छोराले खुलाएपछि प्रहरीले खोज तलास शुरु गरेका थिए ।

सुजिताको हत्याको आरोप लागेका सासु, ससुरा पतिराम र देवरानी रोमालाई पक्राउ गरेको महोत्तरीका प्रहरी नायब उपरीक्षक प्रकाश विष्टले बताए । घटनाबारे थप अनुसन्धान तथा खोजतलास भईरहेको घटनास्थलमा पुगेका प्रदेश प्रहरीका प्रहरी नायब उपरीक्षक ज्ञानकुमार महतोले जानकारी दिए ।