झापामा सवारी दुर्घटनामा घाइते भएका उपप्राध्यापकको मृत्यु

२४ असार,झापा – झापामा सवारी दुर्घटनामा परी मेची बहुमुखी क्याम्पस भद्रपुरका उपप्राध्यापक ५० वर्षीय ताराकान्त झाको मृत्यु भएको छ ।

झापाको भद्रपुर नगरपालिका – ८ स्थित भित्री सडकखण्डमा सवारी दुर्घटनामा परी घाइते भएका उनलाई उपचारका लागि ओमसाई पाथीभरा अस्पताल लगिएको थियो ।  अस्पतालले त्यहाँ उपचार सम्भव नभएको भन्दै उनलाई न्यूरो अस्पताल विराटनगरमा सिफारिश गरेको थियो । न्यूरोमै उपचारका क्रममा उनको बिहीवार मृत्यु भएको प्रहरीले जनाएको छ ।

क्याम्पस रसायन शास्त्र विभागका उपप्राध्यापक झा सवार मे२प २५२५ नम्बरको मोटरसाइकलले भद्रपुरबाट चन्द्रगढीतर्फ जाँदै गर्दा सडकमा रोकी राखेको ना३ख ८५४२ नम्बरकोे ट्रकलाई बुधवार राति ठक्कर दिँदा घाइते भएको थिए ।

झा सवार मोटरसाइकले सो ट्रकमा सामान लोड गर्दै गरेका चालक बुद्धशान्ति गाउँपालिका – १ होक्से निवासी ३५ वर्षीय कमल ढुंगेललाई समेत ठक्कर दिँदा घाइते भएका छन् । उनको बिर्तामोडस्थित बिर्तासिटी अस्पतालमा उपचार भइरहेको छ ।