एमाले कार्यदलको बैठक साँझ पुनः बस्नेगरी स्थगित : दिँउसो आन्तरिक गृहकार्य गर्ने

२४ असार,काठमाण्डौ – आन्तरिक गृहकार्य गर्नका लागि भन्दै नेकपा एमाले कार्यदलको बैठक स्थगित भएको छ ।

आज सिंहदरवारमा बसेको बैठक आन्तरिक गृहकार्य गरी आज बिहीबार साँझ सात बजे पुनः बस्ने गरी स्थगित भएको हो । सहमतिलाई अन्तिम रुप दिनका लागि आन्तरिक गृहकार्य आवश्यक रहेकाले साँझ पुनः बस्ने गरी बैठक सकिएको हो । बैठकपछि दुबै पक्षका कार्यदल सदस्यहरु आन्तरिक छलफलमा जुटेका छन् ।

यसअघि आजको बैठक ढिला गरी सिंहदरबारस्थित अर्थ मन्त्रालयमा शुरु भएको थियो । माधव नेपाल पक्षका कार्यदल संयोजक भीम रावल आउन ढिलाइ भएको कारण कार्यदलको बैठक आधा घण्टा ढिला भएको थियो । कार्यदलको बैठकअघि कार्यदल सदस्य विष्णु पौडेल र भीम रावलबीच २ घण्टा छलफल भएको थियो ।

दुई नेताको छलफलमा लुम्बिनीका मुख्यमन्त्री समेत रहेका ओली पक्षीय नेता शंकर पोखरेल समेत सहभागी भएका थिए । सो भेटबारे जानकारी गराउन रावल माधव नेपाल निवास कोटेश्वर पुगेका थिए । कोटेश्वरबाट रावल फर्किए लगत्तै कार्यदलको बैठक शुरु भएको थियो ।