५७ किलो लागूऔषध गाँजासहित मकवानपुरबाट २ जना पक्राउ

२४ असार,हेटौंडा – मकवानपुर प्रहरीले ५७ किलो ९ सय ग्राम लागूऔषध गाँजासहित २ जनालाई पक्राउ गरेको छ ।

बुधबार साँझ ६ बजेको समयमा इलाका प्रहरी कार्यालय रातोमाटेबाट खटिएको टोलीले पूर्व पश्चिम सडक खण्ड स्थित हेटौंडा उपमहानगरपालिका वडा नम्वर १५ पिपल चौतरामा चितवनबाट बारातर्फ जाँदै गरेको ना. ४ च ५०१५ नम्वरको बोलेरो पिकअप गाडीलाई रोकी चेकजाँच गर्ने क्रममा उक्त गाँजा फेला पारेको हो ।

सो गाडीको पछाडिको भागमा फल्स बटम बनाई लुकाएर ल्याएको गाँजा बरामद गरिएको जिल्ला प्रहरी कार्यालय मकवानपुरका प्रवक्ता प्रहरी नायव उपरिक्षक जयश्वर रिमालले जानकारी दिए ।

प्रहरी नायव उपरिक्षक रिमालका अनुसार गाडीका चालक चितवन जिल्लाको राप्ती नगरपालिका वडा नम्वर ६ बस्ने वर्ष २६ को संजय चौधरी र सोही गाडीमा सवार चितवनकै वर्ष ४८ को लालजी साहलाई नियन्त्रणमा लिएको छ ।