झापामा वडाध्यक्षको ईटा प्रहारबाट स्थानिय युवा गम्भीर घाईते

२३ असार,झापा – झापाको मचिनगरमा वडाअध्यक्षको ईटा प्रहारबाट एक स्थानिय युवा गम्भिर घाईते भएका छन् ।

मेचीनगर नगरपालिकामा सडकमा ढल बनाउने विषयमा विवाद हुँदा वडा नं. १३ का वडाध्यक्ष कृष्णराज सिग्देलको आक्रमणमा परी स्थानीय अर्जुन थेवे घाईते भएका हुन् । विवाद बढ्दै जाँदा वडाध्यक्ष सिग्देलले थेवेको टाउकामा इटा प्रहार गरेका थिए ।

थेवेको चारआलीस्थित मनकामना अस्पतालमा प्राथमिक उपचार पश्चात बिएण्डसी हस्पिटलमा उपचार भैरहेको प्रहरीले जनाएको छ । अहिले घाइते थेवेको अवस्था सामान्य रहेको जिल्ला प्रहरी कार्यालय झापाका प्रवक्ता डिएसपी राकेश थापाले जानकारी दिए ।

उनको टाउकोमा ६ टाँका लगाइएको छ । शुक्रबार अपरान्ह चारआलीस्थित थेवेको घर अगाडि सडकमा ढल निर्माण गर्ने बिषयमा उनीहरु बीच विवाद भएको थियोे । दुईजना बीच धकेलाधकेल भएपछि वडाध्यक्ष सिग्देलले थेवेको टाउकोमा इटा प्रहार गरेको प्रत्यक्षदर्शीले बताए ।

आज घटनाको बिषयमा छलफल गर्ने गरि वडाध्यक्ष सिग्देललाई मेचीनगर नगर प्रमुख बिमल आचार्य र उपप्रमुख मिना उप्रेतीको रोहबरमा चार आली चौकीबाट लगिएको बताइएको छ ।

हालसम्म पीडितको तर्फबाट कुनै किटानी जाहेरी नदिइएको प्रहरीले जनाएको छ । घाइते थेबे नेपाली कांग्रेसको मेचीनगर नगर कमिटीका सचिब हुन् ।