एमाले कार्यदलको बैठक : मिल्ने टुंगो छैन , आ-आफ्नै अडान यथावत

२३ असार,काठमाण्डौ – नेकपा (एमाले)को एकतालाई पुनर्जिवन दिन ब्युँताइएको कार्यदल आइतबारदेखि निरन्तर छलफलमा छ ।

कार्यदलको आइतबार र सोमबार बसेको बैठक सकारात्मक भएको दुवै पक्षका नेताहरुले प्रतिक्रिया दिइरहेका छन् । एमाले नेता एवम् नेपाल पक्षबाट कार्यदल संयोजक रहेका भीम रावलले आइतबारको छलफलफलमा विषय प्रवेश नभएको र सोमबार त्यसमा छलफल भएको जानकारी दिए ।

‘संगठनात्मक प्रणालीसँग सम्बन्धित विषयमा पनि छलफल ग¥यौं,’ रावलले बैठकबारे संवाददाताहरुसँग भने, ‘अदालतको आदेशपछि नेकपा एमाले पुनर्जिवित भइसकेको अवस्थामा संगठनात्मक रुपमा जे जति समस्या थिए, त्यसको समाधान कसरी हुन्छ भनेर छलफल भयो । अब हामी कसरी अगाडि जान सक्छौं भनेर भोलि कुरा गर्छौं ।’

ओली पक्षका संयोजक सुवास नेम्वाङले पनि कार्यदलको छलफल गहन, विस्तृत र विशाल भएको बताए । विभाजनउन्मुख एमालेका दुवै पक्ष सहमति खोज्न फेरि कार्यदलमार्फत जुटेपछि धेरै नेता कार्यकर्ताहरु उत्साहित पनि भएका छन् । तर, बाहिर भएको जत्तिको उत्साह भने छलफलमा दुवैक्षले अगाडि सारेका अडानबाट मिल्ने देखिदैन । कार्यदल ब्युँतिएपछिको पहिलो बैठकमा विषय प्रवेश नगरेकाले मंगलबार भएको बैठकमा अलि विस्तृतमा छलफल भएको छ । यो छलफल मुलतः तीन विषयको वरिपरि केन्द्रित छ, जहाँ दुवै पक्षले आ-आफ्ना अडान अघि सारेका छन् ।

नेपाल पक्ष चाहान्छ सहमतिपछिको एमालेमा आफ्नो सम्मानजनक स्थान होस् । त्यसको अर्थ नेता नेपाल पनि पार्टीको निर्णायक पोजिसनमा रहुन् । नेपाल पक्षले पार्टीमा नेता नेपाललाई कार्यवाहक अध्यक्ष वा प्रधानमन्त्रीमध्ये एक पद वा पार्टीका महत्वपूर्ण निर्णयमा दुवै नेताको हस्ताक्षर हुनुपर्ने सहमति बनोस् भन्ने चाहान्छ । अर्थात, माधव नेपालले ‘नो’ भनेका निर्णय कार्यान्वयनमा जाने अवस्था नहोस् ।

तर, संस्थापन पक्ष यस्ता कुरामा सहमति गर्न तयार छैन् । पार्टीभित्र केपी ओलीको मुट्ठी बाँध्ने गरि कुनै पनि सहमति नहुने कार्यदलमा रहेका ओली पक्षका एक नेता बताउँछन् । पार्टी मिल्दा र नमिल्दा पनि केपी ओलीलाई ‘सेन्टर पावर’ बनाउने कुरामा दायाँ–बायाँ गर्न नसकिने उनको भनाइ छ । ‘केपी ओलीलाई सेन्टर पावर बनाउने विषय नै मुख्य हो,’ उनको भनाइ छ, ‘पार्टी मिल्दा पनि र नमिल्दा पनि केपी ओलीलाई नै सेन्टर पोइन्ट बनाएर जाने कुरा हो, यसमा दायाँ–बायाँ गर्न सकिन्न ।’

नेपाल पक्ष चाहान्छ– पार्टीका सबै कमिटीलाई २०७५ जेठ २ गते अघिको अवस्थाबाट क्रियाशील गराउन गराइयोस् । २०७५ जेठ ३ गते नेकपा एकताअघि एमालेको अन्तिम बैठकबाट मनोनीत भएका ४१ सदस्यलाई पनि सहमतिको आधारमा मात्र समावेश गरियोस् । त्यस्तै रामबहादुर थापा (बादल)सहित माओवादी पक्षबाट नेकपा विघटनसँगै एमाले बनेका २३ जना नेताहरूलाई पनि सामेल गर्ने विषयमा पछि मात्रै निर्णय लिने अहिले नमान्ने ।

यी विषयलाई अडान बनाउँदै नेपाल पक्षले असार १८ गते बोलाइएको केन्द्रीय कमिटी बैठकमा सहभागी भएन । तर, ओली पक्ष नेपाल पक्षको यस्तो अडानलाई स्वीकार गर्न तयार छैन् । जेठ २ मा आंशिक रुपमा फर्किए पनि पूर्णरुपमा त्यही जाने भन्ने कुरा मान्न नसकिने अडान ओली पक्षको छ । बरु मिलन बिन्दूको रुपमा नेकपाकालीन कमिटी ब्युँताउन सकिने ओली पक्षबाट कार्यदल सदस्य रहेका ती नेता बताउँछन् । ‘भाषा जे सुकै राखे पनि नेकपाकालीन कमिटी ब्युँताउने भन्ने कुरामा जाने हो,’ उनी भन्छन्, ‘तर पूर्ण रुपमा जेठ २ कै कमिटी क्रियाशिल बनाउने भन्ने कुरा बेक्कार हो ।’

माधव पक्ष बादल समूह र ४१ जना नेकपामा थपिएका एमालेहरुबाहेकको पहिलो बैठक राख्ने र केन्द्रीय कमिटीमा नवौं महाधिवेशनबाट निर्वाचित भएको अनुपातमा आफ्नो पक्षबाट पनि सदस्यहरु थपेरमात्र टुंगो लगाउनु पर्ने पक्षमा छ । अहिले कार्यदल यीनै विषयमा अल्झिएको छ । दोस्रो पटक संसद विघटन भएको विषयमा सर्वोच्च अदालतमा मा मुद्दा परेपछि त्यसको सुनुवाई समेत सकिएको छ । नेपाल पक्षसमेत शेरबहादुर देउवाको पक्षमा रिट लिएर सर्वोच्चमा गएको थियो । सर्वोच्चले यस विषयमा २८ गते फैसला गर्दैछ ।

ओली पक्षले सर्वोच्च अदालको फैसला जे आउँछ त्यसमा पार्टीको संस्थागत धारणा बनाउने र अगाडि बढ्ने प्रस्ताव ल्याएको छ । यदि सर्वोच्चले संसद पुर्नस्थापित गरिदिएको खण्डमा सरकार कसको हुने भन्नेमा दुवै पक्षबीच विवाद छ । ओली पक्ष संसद पुर्नस्थापित भएको खण्डमा पनि अहिले कै सरकारलाई निरन्तरता दिने भन्ने निर्णय कार्यदलबाट गराउन चाहान्छ । तर, नेपाल पक्ष एमाले कै नेतृत्वमा सरकार बनाउन प्रयास गर्ने भन्ने भाषा राख्नेमा जोड गरिरहेको छ ।

सरकार एमालेकै बनाउने तर प्रधानमन्त्रीका रुपमा ओलीको निरन्तरता नहोस् भन्ने नेपाल पक्ष चाहान्छ । कार्यदलको बैठक भोलि फेरि बस्दै छ । भोलिको बैठकले यी बिषयलाई कतिको छिमोल्न सक्छ भन्ने कुराबाट नै एमालेले पुर्नजीवन पाउँछ या पाउँदैन भन्ने टुंगिने छ ।