स्थानिय तहसहितका निकायमाथिको उजुरीमाथी अख्तियारले बढायो निगरानी : अनलाईन उजुरीलाई प्राथमिकता

२१ असार,काठमाण्डौ – अख्तियार दुरुपयोग अनुसन्धान आयोगले स्थानिय तहसहितका निकायमाथिको अनियमितताको उजुरीमाथी विशेष निगरानी बढाएको छ ।

अख्तियारले जनाए अनुसार संघीय मामिला मन्त्रालय र त्यसअन्तर्गतका विभिन्न स्थानीय तह, शिक्षा क्षेत्रसँग सम्बन्धित विश्वविद्यालय, विद्यालय, शिक्षा कार्यालय तथा युनिट, भूमि प्रशासनसँग सम्बन्धित मालपोत नापी कार्यालय, भौतिक पूर्वाधार तथा यातायात मन्त्रालयअन्तर्गतका निकाय, सकड, यातायातलगायतका क्षेत्रलाई विशेष निगरानीमा राखेको छ ।

यसैगरी वन तथा वातावरण मन्त्रालय मातहतका निकाय, स्वास्थ्य तथा जनसंख्या मन्त्रालयका मातहतका निकाय, ऊर्जा जलस्रोत तथा सिँचाइ मन्त्रालयअन्तर्गतका निकायविरुद्ध पनि अख्तियारमा अत्यधिक उजुरी परेकाले ती निकाय विशेष निगरानीमा राखिएको अख्तियारले जनाएको छ । त्यस्तै उजुरी मध्ये अधिकांश अनलाईन मार्फत् दर्ता भएका छन् । अनलाईनबाट दर्ता भएका उजुरीहरुलाई बिषेश निगरानीमा राखिएकोसमेत अख्तियारले जनाएको छ ।

आयोगमा चालू आर्थिक वर्ष २०७७–७८ को साउनदेखि जेठ मसान्तसम्मको अवधिमा १३ हजार ३३ उजुरी परेका थिए । अघिल्लो वर्षबाट जिम्मेवारी सरेका ८ हजार २ सय र जेठ महिनासम्म परेको १३ हजार ३३ सहित २१ हजार २ सय ३३ उजुरीमध्ये जेठ मसान्तसम्म ११ हजार ४ सय २४ उजुरी फस्र्र्योट भएको आयोगका प्रवक्ता नारायणप्रसाद रिसालले जानकारी दिए ।