खेतमा जमेको पानीमा डुबेर ५ बालिकाको मृत्यु : दुई बालक बेपत्ता भएको आशंका

२८ जेठ,जनकपुर – धनुषाको मुखियापट्टी मुसहरनिया गाउँपालिकामा खेतमा खनिएको खाल्डोमा जमेको पानीमा डुबेर ५ बालिकाको मृत्यु भएको छ ।

शुक्रबार दिउँसो मुखियापट्टी मुसहरनिया गाउँपालिका स्थित् वडा नं.६ मा खेतमा खनिएको खाल्डोमा जमेको पानीमा डुबेर ५ बालिकाको मृत्यु भएको हो । जिल्ला प्रहरी कार्यालयका अनुसार घाँस काट्न गएका बालिकाहरु गर्मी भएपछि दिउँसो १२ः०० बजेको समयमा नजिकैको खेतमा माछा पालनका लागि बनाइएको पोखरीमा नुहाउन गएका थिए ।

नुहाउन गएका बालिकाहरुको पानीमा डुबेर मृत्यु भएको प्रहरीको भनाइ छ। स्थानियको अनुसार दुई बालक अझै बेपत्ता रहेका छन् ।

मृत्यु हुनेमा स्थानीयवासी पल्टु यादवकी १२ वर्षीया छोरी लक्ष्मीनिया, जोगिन्द्र भगतकी १० वर्षीया छोरी चन्द्रकुमारी, राजगिर पुर्वेकी १३ वर्षीया छोरी मञ्जु, जगरनाथ ठाकुरकी १२ वर्षीया छोरी चान्दनी र उतिम साह तेलीकी १२ वर्षीया छोरी ललिताको मृत्यु भएको प्रहरीले जनाएको छ।