आँखु खोलामा डुबेर फुटबल खेलाडी बेपत्ता

२६ जेठ,धादिङ – धादिङको फुटबल खेलाडी सुमन श्रेष्ठ आँखुखोलामा डुबेर बेपत्ता भएका छन् ।

नीलकण्ठ नगरपालिका ३ का २६ वर्षिय फुटबल खेलाडी श्रेष्ठ पौडी खेल्ने क्रममा टारीबेसी स्थित आँखु खोलामा डुबेर वेपत्ता भएका हुन् ।

श्रेष्ठ आज बुधवार, बिहान ८ बजे साथीहरुसँग पौडी खेल्न भन्दै टारीबेसी नजिकै आँखु खोलामा गएका थिए । त्यहि क्रममा आँखुखोलाले बगाएर वेपत्ता पारेको प्रहरीले जनाएको छ । अहिले स्थानीयहरुको सहयोगमा प्रहरीले खोजकार्य जारी राखेको छ ।

बेपत्ता श्रेष्ठ धादिङ समाज धादिङबाट बागमती प्रदेश एन्फा लिगसमेत खेलेका खेलाडी हुन् । त्यस्तै हिजो मंगलबार मात्रै गजुरी स्थित त्रिशुली नदीमा १ जना र ज्वालामुखी खण्ड बुढीगण्डकी नदीमा डुवेर ३ जना वेपत्ता भएका थिए ।