लुम्बिनी प्रदेश राष्ट्रियसभा उपनिर्वाचनमा स्थानीय तहका ३ जनप्रतिनिधि नै अनुपस्थित : कारण यस्तो !

१७ जेठ,काठमाण्डौ – लुम्बिनी प्रदेशको रिक्त एक सिटका लागि सोमबार  भएको उपनिर्वाचनमा प्रदेश सभातर्फ शतप्रतिशत मतदान भएको छ भने स्थानीय तहका ३ जनप्रतिनिधि नै अनुपस्थित भए ।

मतदानमा  ३ सय मतदातामध्ये कुल २९७ मत खसेको हो । जसमा नेपालगञ्ज उपमहानगरपालिकाका मेयर धवलशमशेर राणा मतदानमा सहभागी भएनन्। उनले सार्वजनिक रूपमै  निर्वाचन बहिष्कार गरेका थिए।  यो समय कोरोना महामारी नियन्त्रणको बेला भएकाले चुनाव अनुपयुक्त भएकाले आफू मतदान प्रक्रियामा सहभागी नभएको उनको भनाइ छ ।

यसैगरी  नरैनापुर गाउँपालिका बाँकेका अध्यक्ष मोहम्मद इस्तियाक साह बिरामी भएर उपचार गर्न लखनउ गएका छन्। उनी पनि सहभागी भएनन् ।

यस्तै गुल्मीको दरबार गाउँपालिका अध्यक्ष अशोक थापा पनि बिरामी छन्। उनी काठमाडौंमा उपचार गरिरहेका छन्।  स्थानीय तहका तीन जना जनप्रतिनिधि उपस्थित नभए पनि प्रदेश सभाका भने सबै  ८३ जनाले मत खसालेका छन्।  अब केहीबेरमा मत मेटिकाको मुचुल्का उठाएर मतगणना सुरू हुने प्रदेश निर्वाचन कार्यालय दाङले जनाएको छ । मत परिणाम आजै आउनेछ।