राष्ट्रिय सभा उपनिर्वाचनका लागि आज उम्मेदवारी दर्ता : अन्तिममा किन पछि हटे बादल ?

२४ बैशाख,काठमाण्डौ – बागमती प्रदेशमा रिक्त राष्ट्रिय सभा सदस्य पदको उपनिर्वाचनमा लागि आज उम्मेदवारी मनोनयन हुँदै छ ।

आज (शुक्रबार) हेटौंडास्थित निर्वाचन अधिकृतको कार्यालयमा बिहान १० देखि ४ बजेसम्म उम्मेदवारी दर्ता गरिने निर्वाचन आयोगले जनाएको छ । नेकपा एमालेको ओली समूहमा प्रवेश गरेका रामबहादुर थापा बादललाई माओवादी केन्द्रले कारबाही गरेपछि उनको बागमती प्रदेशमा एउटा पद रिक्त भएको हो ।

उक्त पदपूर्तिका लागि जेष्ठ ६ गते मतदान हुनेछ । प्रदेश सभा सदस्य र पालिका प्रमुख र उपप्रमुखले मतदान गर्ने छन् । बागमती प्रदेशमा १ सय १० सांसद र २३८ पालिका प्रमुख उपप्रमुख गरी कुल ३ सय ४८ जना मतदाताले मतदान गर्न पाउने छन्। विपक्षी गठबन्धन (कांग्रेस, माओवादी, एमालेकै नेपाल – खनाल पक्ष)ले खिमलाल देवकोटालाई उम्मेदवार बनाउने निर्णय गरेको छ ।

सत्तारुढ दल एमाले मनोनयन दर्ताको दिनसम्म पनि उम्मेदवार चयन गर्न सकेको छैन । सुरुमा बादललाई उम्मेदवार बनाउने एमालेको तयारी थियो । तर एमालेको नेपाल पक्ष विपक्षी गठबन्धनमा उभिएपछि बादल उम्मेदवार बन्न हच्किएको पाइएको छ । जित सुनिश्चित भएमात्र उम्मेदवार बन्ने बादलले अडान लिएपछि एमाले स्थायी कमिटीको विहीबारको बैठकले कुनै निर्णय लिन सकेको थिएन ।

एमालेभित्रको विवाद संवादतिर मोडिएकाले मनोनयन दर्ताको समयसम्म एमालेले कसलाई अगाडि सार्छ भन्न सकिने अवस्था छैन ।