जनकपुरमा प्रदर्शनकारी र प्रहरीबीच झडप : प्रहरीले गोली चलायो,केही घाइते (भिडियोसहित)

२२ माघ,काठमाडौं – नेपाल कम्युनिष्ट पार्टी (नेकपा प्रचण्ड-माधव नेपाल समूह)ले गरेको बन्दका क्रममा जकपुरमा नेकपा कार्यकर्ता र प्रहरीबीच झडप भएको छ ।

झडपका क्रममा प्रहरीले गोली पनि चलाएको छ । बन्दकर्ताले प्रहरीकै गाडीमा समेत तोडफोड गरेपछि हवाइ फायर गरिएको प्रहरीको दावी छ ।प्रदर्शनकारीलाई नियन्त्रणमा लिन केही राउण्ड हवाइफायर, अश्रुग्यास र गोली समेत चलाउनु परेको प्रहरीको भनाइ छ ।

झडपमा परि केही नेता तथा कार्यकर्ता घाइते भएका छन् । प्रदर्शनका क्रममा जनकपुरको शिव चोकमा प्रहरी र आन्दोलनकारीबीच झडप भएको हो । झडपका क्रममा दाहाल-नेकपा पक्षका केन्द्रीय सदस्य रामचन्द्र झा घाइते भएका छन् ।

झडपको क्रममा प्रहरीले लाठीचार्ज गर्नुका साथै १ दर्जन राउन्ड हवाइ फायर समेत गरेको जिल्ला प्रहरी कार्यालय धनुषाले जनाएको छ। नेता झाको टाउकोमा चोट लागेको छ । प्रहरीले दर्जनौ नेकपा कार्यकतालाई पक्राउ गरेको छ ।