कोरोना संक्रमणबाट वडाध्यक्षको मृत्यु

२९ मंसिर,दोलखा – कोरोना संक्रमणबाट दोलखामा एक वडाध्यक्षको मृत्यु भएको छ ।

आज सोमबार दिउँसो दोलखाको सैलुङ गाउँपालिका वडा नम्बर ७ का वडाध्यक्ष प्रेम लामाको कोरोना संक्रमणबाट निधन भएको हो । वडाध्यक्ष लामाको ललितपुरस्थित किस्ट मेडिकल कलेजको आईसीयूमा उपचारका क्रममा मृत्यु भएको हो । अस्पतालका अनुसार ५४ वर्षीय वडाध्यक्ष लामाको आज दिउँसो सवा ३ बजे उपचारकै क्रममा निधन भएको हो ।

अस्पतालका अनुसार कडा किसिमको निमोनिया, ज्वरो र सास फेर्न गाह्रो भएपछि उनलाई गत मंसिर २३ गते भर्ना गरिएको थियो ।

गत २४ गते कोभिड पोजेटिभ भएपछि भेन्टिलेटरमा राखेर उपचार सुरु गरिए पनि उनलाई बचाउन नसकिएको अस्पतालका चिफ अपरेटिङ अफिसर अमिश पाठकले जानकारी दिए । उनका अनुसार लामालाई अर्कै अस्पतालबाट किस्टमा रिफर गरिएको थियो ।