आनन्दिलो धाम यो

१. मन्मा शान्ति भयो भने भुवन हो आनन्दिलो धाम यो
आफैभित्र अशान्ति भो यदि भने हो जिन्दगी भार यो।

जो आपत्तिविषे हुनन् सहृदयी आफन्त ती मान्छु म
जल्ले भाव नि दिन्न रक्त हुनुको सम्बन्ध के भन्छु म।।

२. मैत्री भाव भयो भने नजिकको सम्बन्ध बढ्ने त हो
आनन्दी मनबाट प्रीतिरसको नाता जुरेको त हो।

प्रेमी ईश्वर जीवका हृदयमा आएर बस्छन् सदा
बन्छन् नाथ अनाथको पनि उनी आफन्त हुन् सर्वदा।।

३. तेस्रो नेत्र खुलाउने पनि उनै भोले त हुन् शङ्कर
ज्ञानीबाट छ विश्वमा हित हुने कल्याणकारी बल।

जो संवेदनशील हुन्छ उसमा कर्तव्यको बोध छ
जो पाषाणसमान चित्तरसमा हिड्ला कहाँ मूल्य छ?

४. छाती विस्तृत हुन्छ त्यो मनुज हो सेवा दिने गर्दछ
घाती हुन्छ, छ चित्त छुद्र छ भने विश्वासिलो हुन्छ त?

हेरूँ! दृष्टि निजत्वपूर्ण पनि होस् आत्मीयता झन् रहोस्
आत्माबाट विवेक राख्दछ भने हार्दैन यो ख्याल होस्।।

शार्दूलविक्रीडित छन्दमा