नेकपा भित्रको किचलो : विवाद बिसाएर गुट भेलामा सक्रिय हुँदै नेताहरु

२७ मंसिर,काठमाडौं – पछिल्लो समय सत्तारूढ दल नेपाल कम्युनिस्ट पार्टी (नेकपा) का शीर्ष नेताहरू विवादलाई थाति राख्दै गुटको भेलामा सक्रिय हुन थालेका छन् ।

भोली मंसिर २८ गते स्थायी कमिटी बैठक बोलाईए पनि त्यसअघि सहमतिको सम्भावना न्यून देखिएपछि पार्टिका दुवै पक्षका नेताहरु नै गुट सक्रिय बनाउन लागेका छन् ।  प्रधानमन्त्री एवं अध्यक्ष केपी शर्मा ओली संसदीय दलमा बहुमत कायम गर्ने ध्यानमा केन्द्रित देखिएका छन् । अर्का अध्यक्ष पुष्पकमल दाहाल र वरिष्ठ नेता माधवकुमार नेपाल भने गुटको भेला गर्न सक्रिय भएका छन् ।

दाहाल-नेपाल पक्षले बिहीबार गोप्य रूपमा बागमती प्रदेशस्तरीय भेलाको आयोजना गरेर फुटसम्मको अवस्थाको सामना गर्न तयार रहन निर्देशन दिएका छन् । आगामी परिस्थितिको कसरी सामना गर्ने भन्नेमा केन्द्रित भेलामा प्रदेशका १४ जिल्लाका आपूm पक्षीय इन्चार्ज, सहइन्चार्जहरू, अध्यक्ष र सचिवहरू सहभागी भएका थिए ।

अध्यक्ष दाहालले भेलामा ओलीबाट धेरै अपमान सहेको भन्दै अब कडा एक्सनमा जाने बेला आएको बताएका थिए । उनले के विषयमा अपमान गरेको भनेर नबताए पनि बहुमतले निर्णय लिन सक्ने अवस्थामा पुग्ने बताएको एक नेताले जानकारी दिए । उनका अनुसार दाहाल केही नरम रूपमा प्रस्तुत भए पनि नेता नेपाल भने ओलीविरुद्ध निक्कै कडा रूपमा प्रस्तुत भएका थिए । नेता नेपालले प्रधानमन्त्री ओलीको दम्ब, अहंकार र घमण्डलाई चकनाचुर बनाउनैपर्ने बताएका थिए । ‘के छोड्ने, नछोड्ने, हटाउने र नहटाउने भन्ने कुरा उहाँमा भर पर्छ । कमिटीमा आएर कमिटीको मन जित्नुभयो भने किन हटाउनुप¥यो । तर, अब बैठकमा नआउने हो भने निर्णय गर्न बाध्य भइन्छ,’ नेपालको भनाइ उदृत गर्दै अर्का एक नेताले भने, ‘कमिटीका बैठक फेस गर्ने हो भने धेरै कुरा मिलिहाल्छ नि । केपी ओलीको दाउपेच अब समाप्त भएको छ । अब दुई अध्यक्ष मिलेपछि पार्टी निर्णय भन्ने अध्याय समाप्त भयो ।’

दाहाल-नेपाल पक्षले गरेको भेला यो पहिलोपल्ट होइन । यसअघि २० मंसिरमा काठमाडौं क्षेत्र नम्बर ३ मा दाहाल-नेपाल पक्षको अगुवा कार्यकर्ताको भेला भएको थियो । भेलामा वागमती प्रदेश इञ्चार्ज अष्टलक्ष्मी शाक्य, प्रदेश अध्यक्ष दाहाल लगायतका नेताहरूको सहभागिता थियो । त्यसअघि १९ मंसिरमा काठमाडौंस्थित थापाथली क्याम्पसमा दाहाल-नेपाल पक्षका विद्यार्थीहरूले भेला आयोजना गरेका थिए । भेलामा शाक्य, पम्फा भुसाल, रामकुमारी झाँक्री र लेखनाथ न्यौपाने लगायतका नेताहरूको सहभागिता थियो ।

यता, ओली पक्ष भने आफ्नो रणनीति बनाउन व्यस्त रहेको छ । बालुवाटारमा दैनिकजसो नेताहरूबीच छलफल चलिरहेको छ । स्थायी कमिटीले एक मात्र एजेन्डा ‘पार्टीभित्रका समस्या’ बनाएपछि ओली बैठकमा सहभागी हुने तयारीमा छन् । ओलीले स्थायी कमिटी बैठककै दिन बिहान संवैधानिक परिषद्को बैठक बोलाएका छन् । एक वर्षपछि पहिलोपटक बोलाइएको बैठकमा कुनै निर्णय गरेर उनी स्थायी कमिटी बैठकमा जाने तयारीमा छन् । विशेषगरी नेकपाभित्र अख्तियार दुरुपयोग अनुसन्धान आयोगको प्रमुख आयुक्तमा कसलाई नियुक्त गर्ने भन्नेमा विवाद छ । प्रायः सबै नेताहरू कुनै न कुनै घोटलामा मुछिएकाले अख्तियारबाट बच्नका लागि आफ्नो मान्छे त्यहाँ पु¥याउने दाउमा छन् ।

नेकपा संसदीय दलका उपनेतासमेत रहेका ओलीनिकट स्थायी कमिटी सदस्य सुवासचन्द्र नेम्वाङले भने सहमतिको प्रयास भइरहेको बताए । ‘प्रत्यक्ष र अप्रत्यक्ष रूपमा दुई अध्यक्षबीच संवाद र कुराकानी भइरहेको छ,’ नेम्वाङले भने, ‘कतिपय अवस्थामा हामीले पनि संवादको मध्यस्थता गरिरहेका छौँ । यसअघि देखिएको संवादहीनता तोडिएको स्थिति छ । परिस्थिति सकारात्मक दिशातर्फ जाने सम्भावना देखिन्छ ।’

ओली पक्षले यसअघि पनि मदन भण्डारी फाउन्डेसनबाट विभिन्न जिल्लामा गतिविधि गर्दै आएको छ । सो गतिविधिलाई दाहाल–नेपाल पक्षले गुटको भेलाको नाम दिँदै आएका छन् । विवाद जारी रहेकै बेला बुधबार ओली र दाहालबीच भेटवार्ता पनि भएको थियो । भेटमा उनीहरूबीच कुनै सहमति नभएको बताइएको छ । यसअघि ओली र दाहालले पेस गरेको राजनीतिक प्रस्ताव र पत्रमा एक अर्कामाथि गुटबन्दीको आरोप लगाएका थिए ।