सिसिएममीको बैठक बस्दै : फेरी लकडाउन हुनसक्ने

९ मंसिर, काठमाडौं – आज (मंगलबार) कोभिड संकट व्यवस्थापन समिति (सिसिएममी)को बैठक बस्दैछ ।

आजको बैठकले लकडाउनको विषयमा निर्णय गर्ने सम्भावना रहेको उपत्यका मेयर फोरमले जनाएको छ ।

आज बस्ने बैठकमा केके छलफल गर्ने भन्ने एजेण्डा दिईएको छैन तर, लकडाउनको विषयमा भने केही निर्णय हुनेछ उपत्यका मेयर फोरमका सचिव तथा मध्यपुर थिमी नगरपालिका प्रमुख मदन   सुन्दर श्रेष्ठले भने ।

अहिले कक्षा १२ को परीक्षाको कारण लकडाउन केही पर सर्न सक्ने समेत उनले बताए ।

योभन्दा अगाडिको बैठकमा उपत्यका मेयर फोरमले उपत्यकामा सरकारले लापरवाही गरेका कारण कोरोना संक्रमण बढेको निष्र्कषसहित थप लकडाउन गर्नुपर्ने बताएको थियो ।

मेयर फोरमको प्रस्तावलाई सरकारले पोजेटिभ रुपमा लिएको जनाएको छ ।

तर, मेयर फोरमको लकडाउन गर्ने प्रस्तावलाई जनस्वास्थ्य विज्ञहरुले भने ठीक नभएको बताउँदै आएका छन् ।

समुदायस्तरमा कोरोना फैलिसकेको अवस्थामा कोरोना रोकथाम तथा नियन्त्रणको अन्य उपाय प्रयोग गर्नुपर्ने विज्ञहरुले सुझाव दिँदै आएका छन् ।