सुक्न थाल्यो सयपत्री फुल : तिहारमा अभाव हुन सक्ने

२४ कार्तिक,बागलुङ – यस वर्ष तिहार ढिलो गरी आउँदा सयपत्री र मखमली फूलहरु सुक्न थालेका छन् ।

बागलुङका अधिकांशका घरमा लगाईएका सयमत्री र मखमली फुलहरु सुख्न थालेका हुन् ।

तिहार आएको महसुस गराउने फूल बोटमै सुक्न थालेपछि आँउदै गरेको तिहारमा प्राकृतिक फूलका मालाको अभाव हुने निस्चित् भएको छ ।

यस वर्षको तिहार गत वर्षको भन्दा झण्डैं एक महिनापछि धकेलिँदा सयपत्री फूल तिहारका लागि जोगाउन कठिन भएको बागलुङको काठेखोला गाउँपालिकाका स्थानीय युवराज शर्माले बताए ।

यसपालि तिहार अगावै बोटसहित फूलसमेत सुक्ने, ओइलाउने र कुहिने भएपछि धेरै मात्रामा फूल खपत हुने पर्व तिहारमा प्राकृतिक फूलको अभाव हुने अवस्था आएको उनले बताए ।

मठ मन्दिर तथा शक्तिपीठहरु समेत कोरोनाका कारण बन्द अवस्थामा रहेकाले विगतमा जस्तो अन्य समयमा समेत फूलको खपत छैन ।

घरायसी प्रयोजनका लागि तिहारलाई साँचेका फूल सुक्न थालेपछि स्थानीयवासी चिन्तित छन् ।

यस वर्ष अत्यधिक वर्षाका कारण पुष्पखेतीमा असर परेपनि जोगिएका फूल राम्रै फुलेका थिए ।

सामान्यतया तीन/चार महिना अवधि मात्रै रहने सयपत्री फूल यस वर्षको तिहार ढिलो परेकाले फूल जोगाउन नसकिएको शर्माले बताए ।

कात्तिक दोस्रो सातासम्म फक्रिएका फूल मौसम परिवर्तन भएर चिसो बढ्नुका साथै शीत पर्न थालेपछि एक सातामै कुहिएका छन् ।