प्रदेश १ को राजधानी र नाम सहमतीमा तोकिने ः मन्त्री कार्की

प्रदेश १ का आन्तरिक मामिला तथा कानुनमन्त्री हिक्मत कार्कीले प्रदेश १ को राजधानी र नामाकरण सहमतीमा चाडै तोकिने बताए । सो अवसरमा मन्त्री कार्कीले राजधानीका लागि धनकुटा, धरान, इटहरी र विराटनगर चार शहर चर्चामा रहेको उल्लेख गर्दै यिमध्ये एक हुने जानकारी दिए ।

यस्तै प्रदेशको नामाकरणका विषयमा कोशी, सगरमाथा, किराँत, लिम्बुवान, विराट चर्चामा रहेको उल्लेख गर्दै मन्त्री कार्कीले ऐतिहासिकता, भूगोल, पहिचान र सर्वस्वीकार्य राख्नुपर्नेमा जोड दिए । उनले सहमतिमा छोटो नाम राख्ने पक्षमा रहेको बताए । आन्तरिक मामिला तथा कानुन मन्त्रालयले गरेका कामको उद्घाटन तथा निरीक्षणको लागि धनकुटा आएका मन्त्री कार्कीले पत्रकार भेटघाट कार्यक्रममा यस्तो बताएका हुन् ।

सो अवसरमा मन्त्री कार्कीले राजधानी धनकुटा राजधानी भएपनि, नभएपनि विकासमा कुनै कमी नहुने आश्वासन दिए । मन्त्री कार्कीले धनकुटा राजधानीका लागि उपयुक्त ठाउँमध्ये एक रहेको बताए । उनले धनकुटा अस्पताललाई तत्काल सय बेडको अस्पताल बनाई पछि ५ सय बेडको र त्यसलाई नै पछि शिक्षण अस्पताल बनाउने प्रदेश सरकारको योजना रहेको जानकारी दिए । यस्तै मन्त्री कार्कीले धनकुटालाई स्वास्थ्य, शिक्षा र पर्यटन केन्द्रका रुपमा विकास गर्न प्रदेश सरकार लागि परेको जानकारी दिए । उनले उत्तरपानीस्थित प्राविधिक शिक्षालय र धनकुटा बहुमुखी क्याम्पसलाई स्तरबृद्धि गर्ने योजना रहेको बताए ।

मन्त्री कार्कीले धनकुटेली जनताको चाहनाअनुसार थप निर्देशनालयहरु, यातायातको कार्यालयलगायतका कार्यालयहरु राखिने आश्वासन दिए । उनले बेलहारा विमानस्थल निर्माणमा पनि प्रदेश सरकार सकारात्मक रहेको बताए ।

मन्त्री कार्कीले आगामी फागुनमा धनकुटाका ४ गाउँपालिकालाई एमबुलेन्स प्रदान गरिने आश्वासन दिए । यस्तै प्रहरी चौकी भवन निर्माणका लागि २ करोड विनियोजन गरेको जानकारी दिए ।

अर्को प्रसंगमा मन्त्री कार्कीले प्रदेश सरकारले चाडै पूर्णता पाउने जानकारी दिए । उनले प्रदेश सरकार महिला, क्षेत्रीयता, जातीयता मिलाउन ११ सदस्यीय बनाउँदा उचित हुने बताए ।

प्रेस चौतारीका अध्यक्ष तथा पत्रकार महासंघ प्रदेश सदस्य सन्तोष रुचालले सञ्चालन गरेको पत्रकार सम्मेलनमा पत्रकारहरुले सोधेका प्रश्नका उत्तर मन्त्री कार्कीले दिएका थिए । सो अवसरमा प्रदेशसभाका सदस्यहरु निरन राई, इन्द्रमणी पराजुली, कुसुम श्रेष्ठलगायतका नेताहरुको उपस्थिति रहेको थियो ।